Mikið virðist hafa verið að gera hjá lögreglunni í nótt, en í dagbók lögreglu er greint frá því að kona í annarlegu ástandi hafi verið handtekin grunuð um að stela úr verslun í miðbænum. Fram kemur að konan hafi verið búin að bera vörur upp á aðra hæð verslunarinnar og henda þar út um glugga fatnaði að verðmæti 400 – 500 þúsund. Þá er sama kona einnig grunuð um vörslu fíkniefna. Konan var vistuð í fangageymslu lögreglu.
Maður var einnig handtekinn við Ingólfstorg. Hann var ofurölvi og ógnaði fólki með stól og fór ekki eftir fyrirmælum lögreglu. Maðurinn var vistaður sökum ástands í fangageymslu lögreglu.
Þá áttu sér einnig stað nokkur fíkniefna og umferðarlagabrot.