Andri sleit krossband í hné þegar hann var á æfingu með unglingaliði Real Madrid um daginn. Andri mun líklegast ekki geta spilað fótbolta í hálft ár en að sögn umboðsskrifstofu hans gekk aðgerðin þó vel.
Andri hefur verið á mála hjá Real Madrid um nokkurn tíma og vakið mikla athygli þar. Til að mynda fjallaði vefurinn Transfermarkt um Andra fyrir síðsutu jól. Á Transfermarkt var hann sagður vera hreinræktuð nía, alvöru sóknarmaður. Þá var hann einnig sagður vera martröð fyrir varnarmenn. Hann hefur leikið fyrir U16, U17, U18 og U19 ára landslið Íslands.
,,Andri er einn af þeim demöntum sem unglingastarf Real Madrid er með, hann skoraði 37 mörk á síðasta tímabili. Hann var næst markahæsti leikmaðurinn í öllu unglingastarfinu,“sagði Nils Kern, ritstjóri Real Total sem fylgist með öllu starfi Real Madrid.
,,Á næsta ári mun fólk lesa mikið af þennan kraftmikla framherja, hann fer upp í varaliðið. Þar eru stórir og öflugir framherjar velkomnir, hann gæti endað eins og Alvaro Negredo eða Alvaro Morata. Framtíðin mun svara þessu en hann mun án nokkurs vafa, skora mikið af mörkum.“
