Ramsey BethAnn Bearse, 29 ára, var nýlega dæmd í tveggja ára fangelsi af dómstól í Vestur-Virginíu í Bandaríkjunum. Þessi fyrrum ungfrú Kansas var fundin sek um að hafa sent 15 ára pilti, sem var nemandi hennar, fjórar myndir af sér berbrjósta í gegnum Snapchat. Hún verður undir eftirliti skilorðsfulltrúa í 10 ár eftir að hún verður látin laus og verður á skrá yfir kynferðisbrotamenn til æviloka.

CNN skýrir frá þessu. Fram kemur að Bearse hafi verið handtekin í desember 2018 vegna málsins og kærð fyrir að senda klámfengnar myndir til ungmennis. Hún játaði að hafa sent að minnsta kosti fjórar myndir, af brjóstum sínum, til 15 ára fyrrum nemanda síns en hún kenndi við Andrew Jackson Middle School í Cross Lanes.

Foreldrar piltsins fundu myndirnar í síma hans og tilkynntu um málið til lögreglunnar.