Ökumaður sem dottaði undir stýri á Reykjanesbraut um helgina missti við það stjórn á bílnum sínum með þeim afleiðingum að hann lenti á umferðarskilti og  hafnaði utan vegar. Hann slapp ómeiddur en talsverðar skemmdir urðu á bílnum sem flytja þurfti af vettvangi með dráttarbíl.

Þetta kemur fram í tilkynningu frá Lögreglustjóranum á Suðurnesjum. Þá segir enn fremur frá því að lögreglan á Suðurnesjum var kvödd að bílskúr í Keflavík um helgina þar sem þriggja ára barn hafði fallið í stiga. Stiginn var brattur og 2–3 metrar að lengd.

Barnið var flutt með sjúkrabíl til skoðunar á Heilbrigðisstofnun Suðurnesja. Engir sjáanlegir áverkar reyndust vera á barninu og vegnaði því vel eftir komuna á HSS.