Eyjólfur Guðmundsson, rektor Háskólans á Akureyri, segir í viðtali við Vísir.is að ástand húsa sem háskólanum voru gefin sé gott og barnabarn gefandanna sem farið hefur hörðum orðum um Eyjólf og Háskólann á Akureyri, Sigurður Guðmundsson, sé að færa í stíllinn.
Við sögðum í morgun frá harðorðuðum skrifum Sigurðar Guðmundssonar sem segir að rausnarleg húsagjöf afa sinnar og ömmu til Háskólans á Akureyri hafi grotnað niður í umsjá háskólans, sem þar með hafi svívirt minningu gefendanna.
Sigurður segir í grein sinni:
„Þið hafið svívirt minningu afa míns og ömmu með þessari framkomu. Hirðuleysið er slíkt að ekki einu sinni mestu skíthælar landsins hafa svona í sér. Ég óska ykkur alls hins versta sem ég geri nú í fyrsta skipti á ævi minni. Hef hingað til viljað ykkur vel en þeim tíma er lokið. Ég ætla svo innilega að vona að það fari í handaskolum hjá ykkur á næstu árum. Reksturinn fari í rusl og þið sem berið ábyrgð á þessu missið vinnuna sem fyrst.
Þið eruð óhæf og ég vil vara alla við sem hugsanlega ætla að ánafna Háskólanum eitthvað eftir sinn dag láti það ógert.“
Er Vísir.is bar þessi og önnur ummæli Sigurðar undir rektorinn svaraði hann:
„Það sem þessi tiltekna Facebook-færsla hefur verið að reyna að sýna er nú svolítið fært í stílinn og vissulega urðu miklar skemmdir í vetur vegna mikilla snjólægða en skemmdirnar í skóginum urðu miklu meiri. Við munum nýta sumarið til að grisja skóginn og reyna að átta okkur á þeim heildarskemmdum.“
„Húsnæðið sjálft er í góðu standi það sem var í góðu standi fyrir. Það er bæði vatns- og vindhelt og hefur staðið af sér veturna mjög vel og við höfum engar áhyggjur af því húsnæði þó eitt eða tvö handrið þurfi að reisa og setja aðeins málningu á við. Það er ekkert stórmál. Þannig að þetta er nú dálítið í stílinn fært að okkar mati.“
