Sexmenningarnir í Hvalfjarðargangamálinu voru rétt í þessu dæmd í samanlagt 22 ára fangelsi. Þau voru handtekin í umfangsmiklum aðgerðum lögreglunnar á höfuðborgarsvæðinu, lögreglunnar á Vesturlandi og sérsveitar ríkislögreglustjóra. Hafa sakborningar setið í gæsluvarðhaldi síðan 29. febrúar. Fjögur þeirra dæmdu eru pólskir ríkisborgarar og tveir eru íslendingar. Einn íslendinganna er Jaroslava Davidsson sem kennd hefur verið við súlustaðinn Goldfinger sem eiginmaður hennar, Ásgeir Þór Davíðsson eða Geiri í Goldfinger, átti með henni og rak. Geiri lést í apríl 2012 og tók Jaroslava við rekstri súlustaðarins.

Fjórir voru dæmdir í fjögurra ára fangelsi og tvennt, þar á meðan Jaroslava, hlaut þriggja ára fangelsi. Fólkið er dæmt fyrir framleiðslu amfetamíns frá grunni og fyrir mengun sem hlaust af framleiðslunni en úrgangur úr framleiðslunni rann út í náttúruna. Sexmenningarnir voru ennfremur dæmdir til að greiða málskostnað upp á um þrjár og hálfa milljón, og verjendum sínum hvort um sig á bilinu tvær til þrjár milljónir. Verjandi eins sakborningsins sagði við dómsuppkvaðninguna að málinu yrði áfrýjað til Landsréttar.

DV fjallaði um málið í byrjun mars og sagði þá frá því að að framkvæmdar voru húsleitir á hið minnsta sjö stöðum vegna rannsóknar málsins. Athygli vekur að þetta er í fyrsta sinn sem dæmt er fyrir framleiðslu amfetamíns frá grunni og að dómar skuli hafa hlotið fyrir umhverfisspjöll af völdum framleiðslunnar. Lagt var hald á umtalsvert magn fíkniefna, þar á meðal þrjú kíló af amfetamíni í BMW bifreið konunnar sem stöðvuð var við suðurenda Hvalfjarðarganga. Hlaust af því nafnið „Hvalfjarðargangamálið.“ Var hún þá á leið úr sumarbústaðnum sem hópurinn hafði leigt undir framleiðsluna í Borgarfirði.