Athafnamaðurinn Sigmar Vilhjálmsson, betur þekktur sem Simmi Vill, er mikill áhugamaður um mat og eldamennsku. Við fengum að forvitnast aðeins um hvað hann borðar á venjulegum degi.
„Venjulegur dagur byrjar snemma, morgunmatur með sonum mínum og farið í ræktina. Síðan tekur við óvissuferð dagsins sem er vinnutengd, enda veit ég aldrei hvað bíður mín þó að það séu ákveðnir þættir festir niður. Ég reyni að enda alla daga á kvöldmat með sonum mínum, þá viku sem þeir eru hjá mér, og síðan er misjafnt hvort það er frekari vinna sem bíður mín, sófinn eða fjallganga,“ segir Simmi.
Simmi fylgir engu ákveðnu mataræði heldur finnur hann milliveginn. „Ég trúi á að fara millileið í öllu, hvort sem það er mataræði eða annað. Ég er þó alltaf frekar lágkolvetnamegin í lífinu. Annars snýst þetta um að borða allt og hafa það í hófi,“ segir hann og bætir við að hann hafi mjög gaman af eldamennsku.
„Ég lít á matreiðslu og mat sem áhugamál.“ Uppáhaldsmáltíð Simma er sú máltíð sem hann hefur á diskinum á hverjum tíma. „Ég er alæta og finnst mjög gaman að prófa nýja hluti,“ segir hann.
Morgunmatur:
Engiferskot og baunasafi (kaffi).
Millimál nr. 1:
Epli og kaffi.
Hádegismatur:
Lágkolvetna hlöllabátur eða mömmumatur.
Millimál nr. 2:
Kaffibolli eða tveir.
Kvöldmatur:
Dagamunur, en það er alltaf heitur matur í kvöldmat.
