Frumvarp til laga um heimild til að stofna opinbert hlutafélag um uppbyggingu samgönguinnviða á höfuðborgarsvæðinu var í kvöld samþykkt á Alþingi. Frumvarpið heimilar ráðherra að stofna hlutafélag með Reykjavíkurborg, Garðabæ, Hafnarfirði, Seltjarnarnesbæ, Mosfellsbæ og Kópavogi um uppbyggingu á Borgarlínunni svokallaðri.

Maraþon fundur stendur nú yfir á Alþingi og færir Steingrímur J. Sigfússon þingheimi atkvæðagreiðslurnar á færibandi. Hefur blaðamaður löngu tapað tölunni hversu margar þær hafa verið síðan þær hófst fyrr í kvöld.

Samþykkt frumvarpsins og stofnun þessa hlutafélags er mikilvægt skref í þróun Borgarlínunnar og í raun forsenda þátttöku ríkisins að verkefninu. Sigmundur Davíð, annálaður andstæðingur verkefnisins, gerði grein fyrir atkvæði sínu einfaldlega með því að segja „ég tel að Borgarlínan sé stórvarasamt mál og mun gera nánar grein fyrir því á næstu dögum utan við þennan sal.“ Uppskar örræða Sigmundar hlátrasköll í þingsal og Steingrímur J. Forseti Alþingis hélt gríninu gangandi þegar hann benti þingheimi á að hér væru komnar fram nýjar upplýsingar í málinu. Vísar hann þar til þess þegar þingmenn Miðflokksins tóku 2. umræðu um málið yfir með málþófi og fluttu heilu klukkutímana af ræðum gegn frumvarpinu.

Þingmenn fögnuðu

Kolbeinn Óttarsson Proppé, þingmaður Vinstri grænna, óskaði þjóðinni til hamingju með þessa „miklu gleði stund. Gaman er að sjá málið verða að veruleika enda um að ræða gríðarlega miklar framfarir í samgöngum á höfuðborgarsvæðinu öllu. Til hamingju ísland,“ sagði þingmaðurinn.

„Loksins loksins loksins,“ sagði Bryndís Haraldsdóttir, þingmaður Sjálfstæðisflokks. Sagði hún að nú munu höfuðborgarbúar upplifa raunverulegar samgöngubætur á höfuðborgarsvæðinu og lífsgæði höfuðborgarbúa stóraukast.

Ríkissjóður mun eiga 75% í nýju hlutafélagi og öðrum eigendum 25%. Ekki verður heimilt að framselja eignarhlutann til annarra en stofneigenda þess.

Hægt er að sjá frumvarpið í heild sinni á vef Alþingis.