Helgi Vilhjálmsson, betur þekktur sem Helgi í Góu skorar á lífeyrissjóðina að hugsa arðsemi upp á nýtt. Hefur hann hafið undirskriftasöfnun og tekið þátt í að láta búa til hjartnæmt en átakanlegt myndskeið sem sjá má neðst í fréttinni. Helg í Góu segir:
„Í þetta skiptið beinum við kastljósinu að loforðinu sem við gefum við altarið:
„Í blíðu og stríðu þar til dauðinn skilur okkur að,“ sem er í raun og veru „Í blíðu og stríðu þar til heilsan skilur okkur að“, þar sem fólk fær ekki að búa með maka sínum ef makinn þarf umönnun á yfirfullu hjúkrunarheimili.“
Helgi bendir á að fjöldi eldra fólk sé á stöðugum þeytingi og ferðalagi á milli hjúkrunarheimila og eigin heimila með tilheyrandi kostnaði og vanlíðan.
„Lífeyrissjóðirnir geta komið í veg fyrir þann skilnað,“ segir Helgi. „Hvað er arðsemi í raun og veru og til hvers borgum við í lífeyrissjóð? Gott ævikvöld er það sem við vonumst eftir, eða eins gott og kostur er og heilsan leyfir, en að vera aðskilin er ekki það sem eldra fólk óskar sér. Í það ættu fjármunirnir að fara.“
Þá segir Helgi um þessa nýju herferð sína: „Fasteignir eru góð fjárfesting. Fasteign sem þjónar öldruðu fólki betur en hægt er að gera núna er besta fjárfestingin.“
Hægt er að skora á lífeyrissjóðina um breytta fjárfestingarstefnu á síðunni Okkarsjodir.is