Nichole Leigh Mosty, fyrrverandi þingmaður Bjartrar framtíðar, skýtur nokkuð fast á Svan Má Scheving, sem er titlaður bakari og kokkur á Facebook, í stöðufærslu á Facebook. Nichole birtir skjáskot af athugasemd Svans og segir hann fordómafullan.
Forsaga málsins er að Helga Vala Helgadóttir, nýr þingmaður Samfylkingarinnar, segir á Facebook-síðu sinni að stjórnarandstöðunni sé nú kennt um að ný ríkisstjórn fái ekki að leggja fram fjárlög síðustu ríkisstjórnar. „Welcome to your new life Helga Vala mín,“ skrifar Nichole í athugasemd við færsluna, en þingkonan fyrrverandi er ættuð frá Bandaríkjunum.
Þá skrifar Svanur: „Getur þú ekki talað íslensku“. Nichole spyr á móti hvort hann hafi ekki smá húmor og að hún megi nú tala það tungumál sem henni sýnist. Athugasemd Svans hefur nú verið eytt en svar hans má sjá í skjáskoti Nichole. „Þú ættir að skammast þín þar sem þú ert þingmaður og á launaskrá hjá okkur, ættir að reyna að sýna íslensku þjóðinni smá sóma,“ skrifar Svanur.
Nichole segir í færslu sinni á Facebook þar sem hún gagnrýnir Svan að enska sé hennar móðurmál. „Kæri fordómafullur fullorðin karlmenn (að mestu leiti) ég er ekki lengur að starfa sem Þingmaður og það er ekki lengur ykkur hlutverk að koma fram við mig af fordóma, dónaskapi eða neikvæðni. Ensku er móðurmálið mitt og ég mun nóta það hvenær og hvar sem er,“ skrifar Nichole og deilir pistli hennar sem birtist í Fréttablaðinu á dögunum.
Nichole segir að einn daginn muni menn eins og Svanur skilja framlag útlendinga til íslensks samfélags. „Einhvern tíma muni fólk meta mig fyrir hvað ég geri, hver ég er og hvaða hugsjón ég hef frekar en hvernig ég skrifa og tala íslensku! Ekki bara mig heldur allir okkur 10% nýju íslendingar sem hlut af þjóðin… okkur vinnuafl og skatt pening er vel þegið er það ekki,“ segir Nichole.
Andri Snær Magnason, rithöfundur og fyrrverandi forsetaframbjóðandi, skrifar stutta athugasemd við færslu Nichole: „oj hræðilegur maður“.
