Norrænu flugfélögin SAS og Norwegian eru talin skulda viðskiptavinum sínum sem svarar til um 130 milljarða íslenskra króna vegna flugferða sem var aflýst vegna heimsfaraldurs kórónuveiru. SAS skuldar bróðurpartinn af upphæðinni eða um 88 milljarða.

Þeir sem ætluðu að ferðast með flugfélögunum í mars fá ferðirnar endurgreiddar nú í júní. Þeir sem ætluðu að ferðast með félögunum í apríl og maí fá ekki endurgreitt fyrr en í haust. Bergens Tidende skýrir frá þessu.

SAS skuldar farþegum meira en félagið á í reiðufé en John Eckhoff, upplýsingafulltrúi félagsins, segir öruggt að allir þeir fái endurgreitt sem þess óska.  Í því sambandi bendir hann á að yfirvöld í Svíþjóð og Danmörku hafi veitt félaginu lán upp á sem svarar til um 40 milljarða íslenskra króna. Að auki vinnur SAS nú eftir áætlun sem á að færa félaginu meira fé.

Upplýsingafulltrúi Norwegian vildi ekki upplýsa hversu mikið félagið skuldar viðskiptavinum sínum en sérfræðingar telja það vera sem svarar til 26 til 52 milljarða íslenskra króna.