Bryndís Sigurðardóttir smitsjúkdómalæknir gagnrýnir áætlun um skimun allra ferðamanna sem koma hingað til landsins frá og með 15. júní. Hún telur að skimunin tryggi ekki öryggi landsmanna og sé tímaeyðsla og peningasóun.
Bryndís sagði í Kastljósi í kvöld að áætlun heilbrigðisyfirvalda um skimun ferðamanna hafi komist mjög fljótt í ferli án þess að umræða um hana væri tekin. Hún hefur efasemdir um gagnsemi þess að skima hrausta einstaklinga sem koma til landins. Upplýsingar sem sýna háa tíðni falskra jákvæðra sýna vekja henni áhyggjur en hún sagði að jafnvel einn af hverjum fjórum væru einkennalausir fyrstu fimm dagana inn í veikindin. Sagði hún að átta hefðu greinst hér á landi í maí sem hefði flestir verið einkennalausir en hafa sögu um gamalt smit og greinast því núna jákvæðir. Þessir einstaklingar séu búnir að jafna sig ef þeir voru þá nokkurn tíma veikir og séu komnir með mótefni gegn veirunni. Bryndís bendir á að slíkt hið sama gæti gilt um einstaklinga sem koma hingað til landsins og greinast jákvæðir. Smitrakning varðandi þessa einstaklinga fari þá í gang og þeir fari í einangrun og vandamenn þeirra sem eru með í för fari í 14 daga sóttkví. Allt sé þetta í boði ríkisins og hún setur spurningamerki við réttmæti þess að fara í svo umfangsmiklar og dýrar aðgerðir á vafasömum forsendum.
Bryndís sagði einnig að hingað eigi eftir að koma ferðamenn sem gefi falskt neikvætt sýni og því sé ljóst að veiran muni koma til landsins.
„Orkan og flækjustigið sem fer í að útfæra þetta verkefni, þetta verður mjög erfitt og ég efast um að það sé þess virði,“ sagði Bryndís í Kastljósi.
Smitsjúkdómalæknar á Landspítalanum vilja seinka opnun landsins og Bryndís sagði að það væri kannski gott að bíða dálítið og fylgjast með því sem er að gerast í Evrópu.
Þórólfur Guðnason sóttvarnalæknir var einnig í Kastljósi og benti hann á að þó að verkefnið væri viðamikið og dýrt þá væri með því verið að fjárfesta í innviðum til framtíðar.
Innviði á veirufræðideild og innviði á Keflavíkurflugvelli varðandi sóttvarnir þyrfti að styrkja og þetta verkefni myndi styrkja sóttvarnir til framtíðar, vildi Þórólfur meina.
„Þetta er kostnaður en það þarf að gera þetta, þetta er verkefni sem mun skila sér,“ sagði Þórólfur.
Þórólfur benti á að þegar einstaklingur greindist jákvæður væri hægt að gera ýmsar rannsóknir til að komast að því hvort viðkomandi væri smitandi eða ekki, það væri t.d. hægt að beita blóðprufu. Þá væri ýmislegt í mælingunni sem gæfi til kynna hvort um gamalt smit væri að ræða eða ekki. Hann sagði alls ekki gefið að allir sem greindust með veiruna við komu til landsins þyrftu að fara í einangrun og þar með þyrfti samferðafólk þeirra ekki að fara í sóttkví.
