Bachelor stjarnan Hannah Brown hefur vakið úlfúð fyrir rasísk ummæli sín í beinni útsendingu á Instagram. Hannah sagði „n-orðið“ (e. n-word) á meðan hún söng lagið Rockstar með DaBaby.
Um leið og Hannah lét ummælin falla fékk hún óteljandi skilaboð sem bentu henni á hvað hún hafði sagt. Hannah baðst strax afsökunar en sagðist seinna ekki vera viss um að þetta hafi verið hún sem sagði orðið. E! News greinir frá.
„Ég held að ég hafi ekki sagt þetta orð […] Ég myndi aldrei nota þetta orð. Ég myndi aldrei kalla neinn þetta. Við segjum ekki þetta orð,“ segir hún og telur að bróðir sinn hafi sagt orðið, en ekki hún.
Í myndbandinu hér að neðan má sjá þegar hún syngur lagið og segir n-orðið.
Nokkrar Bachelor-stjörnur hafa stigið fram og gagnrýnt Hönnuh, sem tjáði sig aftur um málið í gærkvöldi á Instagram.
„Ég skulda ykkur öllum risastóra afsökunarbeiðni […] Ég gengst við ábyrgðinni og mér þykir þetta ótrúlega leitt,“ segir Hannah Brown og lofar jafnframt að standa sig betur.
