Ríkisstjórn Boris Johnson, hefur beðið allar stærstu íþróttagreinar landsins um að byrja að undirbúa endurkomu. Ríkisstjórnin vonast til þess að íþróttir fari af stað í byrjun júní, með þessu vilja þau reyna að létta lundina hjá þjóðinni eftir erfiða tíma. Ekki hefur verið spilað í tæpa tvo mánuði vegna kórónuveirunnar.

Áhorfendur fá ekki að mæta á völlinn en vonir standa til um að alli 92 leikirnir verði í beinni útsendingu í ensku úrvalsdeildinni.

Miklar deilur eru um það hvort það sé óhætt fyrir fótboltann að snúa aftur, Frakkland hefur ákveðið að banna íþróttaviðburði fram í ágúst.

Miklir fjármunir eru í húfi og vill enska úrvalsdeildin klára mót sitt til að tapa þeim ekki. ,,Læknir FIFA segir að fótboltinn eigi ekki að fara af stað fyrr en í september, ef það væru ekki fjármunir í spilinu þá yrði ekki fótbolti næstu mánuðina,“ sagði Gary Neville sérfræðingur Sky Sports.

Hann óttast að smit verði þegar fótboltinn fari af stað og illa geti farið. ,,Fólk er að meta áhættuna? Hversu margir þurfa að deyja í enska boltanum áður en þeir hætta þá að spila? Einn? Einn leikmaður? Einn starfsmaður fer á gjörgæslu? Hvaða áhættu á að taka? Umræðan hjá félögunum er bara um peninga.“