Björn Geir Leifsson, skurðlæknir með meistarapróf í stjórnun og lýðheilsu, varar við hættulegum ráðum sem dreifast um netið vegna COVID-19 veirunnar.
Björn segir að undanfarið hafi fólk verið að dreifa slíkum ráðum á Facebook. Hann nefnir sem dæmi klór, sem hann segir ekki veran lyf heldur lífshættulegt fyrirbæri, sé það tekið inn líkt og lyf.
„AÐVÖRUN! Óvitar eru að dreifa hættulegri vitleysu um netið, ekki síst á Facebook.
KLÓR ER ALLS EKKI LYF VIÐ KÓRÓNAVEIRU EÐA ÖÐRUM VEIKINDUM EÐA HEILSUBRESTI!
Það er hættulegt að taka inn klór, jafnvel í litlu magni. Það hefur valdið dauðsföllum. Það er ENN hættulegra að blanda sýru (ediki, sítrónusafa eða þess háttar) í klór, við það losnar eitrað gas.
Yfirvöld stöðvuðu sölu á iðnaðarklór í íslenskum heilsubúðum 2010 þegar óvitar voru að selja þetta undir heitinu „MMS-lyf“. sem átti að gagnast við flestu og gott betur. Þessi tiltekna vitleysa er upprunnin frá sjálfskipuðum „biskupi“ í bandaríkjunum. Sá er ekki með öllum mjalla svo vægt sé til orða tekið. Þetta er meðal annars ráðlagt sem meðal við einhverfu og hefur skaðað og drepið marga. Því miður eru til dæmi um að íslenskir græðarar séu að ráðleggja að kaupa þetta á netinu og taka inn!“
Fyrir nokkrum dögum birti Íslendingur Facebook-færslu þar sem hann ráðlagði fólki að taka inn klór gegn COVID-19. Líklega var Björn Geir að svara þeirri færslu óbeint, sem má lesa hér að neðan.
„Þetta er dánar tíðni vegna þess að stjórnvöld víða eru að hugsa um efnahagsvandann sem hlýst. Þeir eru ekki með hugan að lækningu. Hversvegna.? Þeir láta Lyfjarisanna þ.e. glóbalistana ráða þessum málum. Nú hefir verið til efni sem drepur kórónuna og það er einfaldur klór. já klór sem blandað er í vatn í flestum löndum nema Norður Ítalíu. sem námu bakteríuna og sendu um alla Evrópu með skíðamönnum og öðrum túristum. Já við sjáum til sögðu stjórnar elíturnar svo nú er komið sem komið er á Íslandi og mun margfaldast eins og píramítalögmálið. Munið samt EplaCider ein til tvær matskeiðar í glas af vatni og 2 til 4 dropa að klór sem er virka efnið í malaríulyfinu. Hafið þetta í huga í hið minnsta eftir að þið verðið veik en betra áður þá 2 dropa. Dropateljarar til í apóteki.“
Þá bjó Björn Geir til lista yfir hluti sem virka alls ekki á veirur og geta jafnvel verið hamlandi. Hann sagði að þeir sem að ráðleggi fólki um slíkt séu óvitar í læknaleik.
„Efni og vörur sem auðtrúa óvitar í læknisleik eru þessa dagana að ráðleggja á netinu en VIRKA ALLS EKKI VERNDANDI, HAMLANDI EÐA LÆKNANDI á veirur, eru meðal annars (ekki tæmandi listi):
KLÓR (sjá hér f. ofan)
EDIK (epla eða annað)
C vítamín – Nei, það virkar heldur ekki á kvef
E vítamín
D vítamín -skortur á því veikir vissulega varnir líkamans en fæstir eru með svo mikinn skort að inntaka gagnist í bráð
ILMKJARNAOLÍUR („essential oils„)
TEA TREE olía (eitruð)
GRASAMEÐUL af öllu tagi
HVÍTLAUKUR
LAUKUR í sokkinn að sofa með
BLAUTIR sokkar (sofa í)
NEFSKOLUN ekki heldur með stöðnu þvagi (ekki grín)
SMÁSKAMMTAR(hómeópatíuremedíur, hverju nafni sem þær nefnast)
BLÓMADROPAR
LÝSI
TURMERIK/CURCUMIN
ENGIFER – Hressandi v. kvef en hvorki verndandi né læknandi
OMEGA 3
HNYKKINGAR
AYURVEDAmeðul (slík geta innihaldið eitraða þungmálma, a.m.k. ekki kaupa á netinu!)
SILFURVATN (colloidal silver) – getur valdið blágráum litabreytingum á húð.
PRECOLD/COLSZYME munnúði
ZINK
SÓLHATTUR (Echinacea)
kVÖLDVORRÓSAROLÍA
ANDOXUNAREFNI hvers konar, m.a. Astaxanthin sem mikið er auglýst þessa dagana og gefið í skyn að hjálpi
FÆÐUÓTAREFNI af öllu tagi.
ÚTFJÓLUBLÁTT LJÓS (sólarlampar t.d.) getur valdið bruna og krabbameini í húð
… og svo það undarlegasta af öllu sem ég hef séð ráðlagt við kórónaveirunni nýlega:
KÚAMYKJA OG KÚAHLAND Samkvæmt indverska gúrúinum ‚Swami Chakrapani Maharaj‘. (Ekki grín)
Swami-inn tekur þó fram að kýrin verði helst að vera indversk og ekki hafa verið að éta rusl á götunum. Mykjunni á að maka á líkamann og drekka kúahlandið meðan kyrjaðar eru Shiva möntrur!“
Að lokum segir Björn fólki að grípa ekki til eigin ráða finni það fyrir einkennum COVID-19, þó að það treysti ekki heilbrigðisyfirvöldum.
„EKKI TAKA TIL EIGIN RÁÐA!
ef þú heldur að þú sért veikur af kórónaveiru eða öðru.
HVERSU ILLA SEM YKKUR ER VIÐ VÍSINDI OG HEILBRIGÐISYFIRVÖLD ÞÁ GETUR ÞAÐ REYNST AFDRIFARÍKT AÐ TEFJA RÉTTA RANNSÓKN OG MEÐFERÐ MEÐ ÞVÍ AÐ VERA AÐ TREYSTA UM OF Á VITLEYSUR AF NETINU! Flestar eru þær bara kjánalegar en eins og kemur fram hér þá eru sumar þeirra hreinlega varasamar.“
