Norskur bílþjófur kemst ekki í sögubækurnar fyrir velútfærðan bílþjófnað en hins vegar gæti hann komist á lista yfir lélegustu bílþjófa sögunnar. Aðfaranótt föstudags reyndi hann að stela Lexus í Bærum við Osló. Eigandi bílsins vaknaði við atganginn og fór að kanna málið.

Samkvæmt frétt TV2 þá lenti eigandinn í handalögmálum við bílþjófinn sem ógnaði bíleigandanum með hníf áður en hann lét sig hverfa af vettvangi. En þar með er sögunni ekki lokið því lögreglan hefur ákveðinn mann grunaðan um verknaðinn því hann gleymdi farsíma sínum og spjaldtölvu í bílnum sem hann náði ekki að stela.

Talsmaður lögreglunnar sagði að mikil áhersla verði lögð á að finna hinn misheppnaða þjóf.