„Ég ætla að leggja það til við for­sætis­ráð­herra að refsing þín fyrir þessar á­ætlanir Ás­laug Arna verði sú að þú sért skikkuð til þess að vinna eina viku á Vogi, sitja þar fundi og anda að þér angistinni hyl­djúpu sem fylgir þeim sem eru að takast á við al­var­legan alkó­hól­isma og aðra fíkni­sjúk­dóma,“

segir í niðurlaginu í opinni grein Kára Stefánssonar, forstjóra Íslenskrar erfðagreiningar, á vef Fréttablaðsins í dag, til Áslaugar Örnu Sigurbjörnsdóttur dómsmálaráðherra, hvar hann gagnrýnir hana harðlega vegna frumvarps hennar um að leyfa sölu áfengis í netverslun.

Þurfi að finna sér nýja vinnu

Kári segir að með frumvarpinu sé Áslaug að fremja alvarleg embættisafglöp sem séu jafnvel glæpsamleg, nái það fram að ganga:

„Í stað þess að gegna skyldum þínum hyggstu nýta þér em­bættið sem fylgja þessar skyldur til þess að auka líkur á al­var­legum um­ferðar­slysum, of­beldis­glæpum og heimilis­of­beldi. Þetta eru mis­tök sem ættu að flokkast sem al­var­leg em­bættis­af­glöp, nema þetta sé ein­fald­lega glæpur. Það sam­rýmist engan vegin em­bætti dóms­mála­ráð­herra að leggja fram frum­vörp til laga sem auka líkur á því að lög séu brotin. Þess vegna verður þú annað hvort að hætta við frum­vörpin eða finna þér nýja vinnu.“

Reynsluleysi sökum aldurs

Kári gerir ungan aldur Áslaugar að umfjöllunarefni og sakar hana um reynsluleysi:

„Ung­dómnum fylgir hins vegar fleira en fersk­leiki og nýjar hug­myndir og þar á meðal er reynslu­leysi og reynslu­leysið getur af sér mis­tök. Og þótt ung­dómurinn hafi ekki einka­rétt á mis­tökum er hann hann býsna frekur til þeirra. Ég held til dæmis að það séu mjög al­var­leg mis­tök af dóms­mála­ráð­herra að leggjast í víking til þess að reyna að auka að­gengi að á­fengi í landinu. Það vill svo til að það er nokkuð línu­legt sam­band milli að­gengis að á­fengi og neyslu þess, því auð­veldara að­gengi þeim mun meiri neysla. Því meiri neysla á­fengis þeim mun meira af öllum þeim vanda­málum sem fylgja henni,“

segir Kári og bætir við:

„Þú ert svo ung að þú hefur sjálf­sagt ekki orðið vitni að því hvernig á­fengi hefur til­hneigingu til þess að leysa upp fjöl­skyldur og skilja börn eftir lömuð af sorg af því þau hafa ekki hug­mynd um hvað er að gerast.“

Auki kolefnisfótsporið

Kári segir að frumvarp Áslaugar gangi þvert gegn hlutverki ráðuneytis hennar, sem sé að stemma stigu við ofbeldisglæpum, umferðarslysum og heimilisofbeldi. Nái frumvarp Áslaugar fram að ganga, muni það auka tíðni þessa alls, auk þess að auka kolefnisfótspor mannsins:

„Ég hef velt því tölu­vert fyrir mér hvernig þú hafir komist að þeirri niður­stöðu að net­sala á á­fengi myndi minnka kol­efnis­spor og fæ ekki betur séð en að þú reiknir með því að landinn muni drekka meira og þar af leiðandi keyra minna, nema það sé skoðun ung­liða Sjálf­stæðis­flokksins að það hljótist ekkert kol­efnis­spor af því að keyra fullur?“

Sjá einnig: Áfengisverð allt að 68% ódýrara í Costco en Vínbúðunum – ÁTVR sagt fara á hausinn með nýju frumvarpi