Meng Hongwei, sem er fyrrverandi yfirmaður Interpol, var dæmdur í 13 og hálfs árs fangelsi fyrir að hafa tekið við yfir 258 milljónum króna í mútur. Dómstólar í kínversku borginni Tianjin greina frá þessu samkvæmt fréttamiðlinum Reuters.

Meng Hongwei játaði, strax í upphafi réttarhaldanna í júní, að hafa tekið við milljónunum. Kínverks yfirvöld greindu frá því í október 2018 að fyrrverandi yfirmaður hjá Interpol sætti rannsókn vegna lögbrota. Sama dag greindi Interpol frá því að Meng Hongwei hefði sagt starfi sínu lausu.

Konan tilkynnti að hans væri saknað

Þegar þetta átti sér stað hafði Meng Hongwei verið saknað í tvær vikur. Það var kona hans sem tilkynnti að hans væri saknað, þegar hann snéri ekki heim eða á skrifstofu sína í Frakklandi, eftir ferð til Kína. Það kom í ljós síðar að hann hafði verið handtekinn í heimalandi sínu.

Meng Hongwei var varaöryggismálaráðherra Kína, áður en hann varð yfirmaður hjá Interpol. Í mars 2019 var hann rekinn úr kommúnistaflokknum í kjölfar herferðar gegn spillingu, sem Xi Jinping setti í gang. Það kom í ljós að hann hafði notað stórar fjárhæðir af fjármunum ríkisins, misbeitt valdi sínu og neitað að fara eftir því sem kommúnistaflokkurinn ákvað.