Aðalmeðferð í morðmáli Birnu Brjánsdóttur fer nú fram í héraðsdómi Reykjaness. Sakborningurinn Thomas Möller Olsen lýsir nú sinni hlið á atburðunum.
Nú er farið yfir seinni ákærulið á hendur Thomasi Möller Olsen, um fíkniefnainnflutning á 24 kílógrömmum af kannabisefnum. Thomas viðurkennir að hafa flutt efnin til landsins um borð í togaranum Polar Nanoq.
Hann sagði þó aðeins hafa tekið þetta að sér en ekki fjármagnað flutninginn sjálfur. „Ég var spurður hvort ég gæti tekið þau og ég sagði já.“
Aðspurður um það af hverju hann fleygði þeim ekki í hafið þegar hann vissi að von væri á lögreglumönnunum sagði hann: „Af því ég vildi ekki vera hluti af þessu lengur. Ef ég hefði hent þeim í sjóinn þá hefðu þeir haldið að ég hefði stolið þeim og gert slæma hluti við mig“.
Hann sagði að efnin hafi aldrei farið úr togaranum en þau áttu að fara til Grænlands.
