Thomas Møller Olsen, sem er sakaður um að hafa myrt Birnu Brjánsdóttur, neitar enn sök. Þetta kom fram við aðalmeðferð í málinu við Héraðsdóm Reykjavíkur rétt í þessu. Skýrslutökur munu fara fram næstu klukkutíma en gert er ráð fyrir að skýrslutaka hans muni standa yfir í nærri níutíu mínútur.
Hann er sagður niðurlútur en hann tjáir sig með aðstoð grænlensk túlks. Á eftir honum mun hinn skipverjinn sem sat um tíma í gæsluvarðhaldi bera vitni.
RÚV greinir frá þessu. Málið vakti mikla athygli en rannsókn þess var viðamikil og flókin.
Lögreglumenn úr sérsveit ríkislögreglustjóra fóru um borð í Polar Nanoq, þar sem togarinn var staddur á milli Íslands og Grænlands, og handtóku Olsen og annan skipverja. Olsen hefur setið í gæsluvarðhaldi síðan en hinum skipverjanum var sleppt eftir tvær vikur en hann er ekki grunaður um aðild að málinu.
Vísir vitnar í lýsingu Thomas á föstudeginum: „Eftir að við hættum á að vinna síðdegis fórum ég og Inuk og leigðum bíl saman, já það var Inuk, klukkan fimm. Svo fórum við í bíltúr og kíktum í Kringluna og Smáralind. Fengum okkur að borða í Smáralind. Síðan eftir smá bíltúr fórum við niður í skip.
Við fórum í ræktina, en ég man ekki hvar. Eftir æfinguna forum við í smá göngutúr og forum aftur í skipið um klukkan ellefu um kvöldið. Svo sáum við Nikolaj fara niður í bæ aleinan. Svo við skutluðum honum. Það var örugglega í kringum 11:30. Hann var kominn fyrir miðnætti niður í bæ. Hann bað okkur oft að vera með honum en svo forum við aftur í skipið. Svo forum við í sturtu í skipinu, við erum í sitthvorri káetunni.
Ég talaði við kærustuna mína og Inuk talaði við kærustuna sína og Nikolaj heldur áfram að senda okkur á messenger og biðja okkur að koma. Eftir að ég talaði aðeins við kærustuna mína á Facetime þá sofnaði ég.“
