Myndir þú leggja á þig 1.300 km göngu ef þú eygðir von um kynlíf að göngu lokinni? Það er kannski ekki svo auðvelt að svara þessu en eflaust myndu einhverjir leggja þetta á sig. Það gerði að minnsta kosti indverskt tígrisdýr sem lagði 1.300 km göngu á sig á fimm mánuðum til að finna kvendýr til að makast með.

BBC skýrir frá þessu. Fram kemur að staðsetningartæki hafi verið sett á dýrið í febrúar. Það sýnir að í júní lagði dýrið af stað í ferðalag. Bilal Habib, sérfræðingur hjá Wildlife Institute of India, sagði að dýrið hafi væntanlega verið í leit að yfirráðasvæði, mat og maka. Flest svæði, þar sem tígrisdýr geti hreiðrað um sig á Indlandi, séu nú þegar upptekin og því verði ung dýr oft að leita langt að nýju yfirráðasvæði.

Á ferð sinni fór tígrisdýrið, sem er nefnt C1, yfir ár, yfir landareignir bænda og meira að segja hraðbraut. Einn maður slasaðist þegar hann komst í kast við dýrið en það var þegar hópur fólks gekk framhjá runna þar sem dýrið svaf.

BBC segir að einn mesti vandinn sem steðjar að tígrisdýrum á Indlandi sé að þeim hafi fjölgað en um leið hafi búsetusvæðum þeirra fækkað og ekki sé alltaf nóg af bráð að hafa.