Í síðustu viku var 27 ára dýralækni nauðgað af fjórum mönnum í Hyderabad sem er austan við Mumbai á Indlandi. Að því loknu fluttu mennirnir konuna á brott í sendibíl en hún var hálfmeðvitundarlaus eftir nauðganirnar og ofbeldið sem hún var beitt. Þeir komu konunnin fyrir undir brú, helltu bensíni yfir hana og báru eld að henni.

CNN skýrir frá þessu. Fram kemur að rannsókn réttarmeinafræðinga hafi verið mjög erfið viðfangs því svo miklir áverkar voru á líki konunnar sem hefur ekki verið nafngreind en það er óheimilt samkvæmt indverskum lögum.

Fjórmenningarnir voru fljótlega handteknir og til mikilla mótmæla kom víða um landið þar sem skjótrar málsmeðferðar var krafist sem og dauða yfir fjórmenningunum.

Mörg hrottaleg nauðgunarmál hafa komið upp á Indlandi á undanförnum misserum, ekki síst á landsbyggðinni. Almenningur safnast oft saman til að mótmæla ofbeldinu og krefjast harðra aðgerða. Í júní voru þrír menn dæmdir í lífstíðarfangelsi fyrir að hafa nauðgað og myrt átta ára stúlku. Einn þeirra er hindúaprestur.