Gunnar Smári Egilsson, fjölmiðlamaður og sósíalisti, segir frétt sem birtist á vef RÚV stórfurðulega. Fréttin er byggð á viðtali við Pétur Þ. Óskarsson, forstjóra Íslandsstofu, á Rás 1. Hann var spurður um hvort Samherjamálið hefði áhrif á orðspor Íslands. Gunnar Smári bendir á að hann er líklega ekki alveg hlutlaus þar sem nýr framkvæmdastjóri Samherja er stjórnarformaður Íslandstofu.

Pétur sagði málið engin áhrif hafa á orðspor Íslands. „Við höfum ekki fengið nein dæmi um það að önnur íslensk fyrirtæki séu að finna fyrir þessu máli í sínum viðskiptum og umfjöllunin hefur ekki verið að tengjast Íslandi eða íslensku samfélagi með beinum hætti. [Það er] bundið við Samherja og meintar aðgerðir þeirra í Namibíu. Raunar í fjörutíu prósentum af þeirri erlendu umfjöllun um málið sem að birst hefur þá hefur ekki verið minnst á Ísland,“ var haft eftir Pétri.

Gunnar Smári segir að RÚV hefði ekki átt að spyrja þennan mann að þessu. „Er þetta grínfrétt? Framkvæmdastjóri íslandsstofu, hvers stjórnarformaðurinn er orðinn forstjóri Samherja, segir Samherja-hneykslið ekki hafa skaða neitt. Af hverju spurðu RÚV ekki bara Þorstein Má sjálfan? Það er ekki nóg að geta þessara tengsla í lok fréttar, hin réttu viðbrögð eru að hringja ekki í Íslandsstofu næstu þrjá áratugina,“ segir Gunnar Smári í færslu í Facebook-hóp sósíalista á Íslandi.

Hann segir enn fremur að óháð þessu þá sé Íslandstofa ekki hlutlaus aðili. „Íslandsstofa er heldur ekki hlutlaus opinber stofnun heldur eitthvert drullumakerí stjórnvalda og fjármagns- og fyrirtækjaeigenda, leikvöllur fyrir fulltrúa hinna ríku að leika sér með skattfé,“ segir Gunnar Smári.

Árni Sveinsson kvikmyndagerðarmaður bætir við þetta og birtir mynd af stjórn Íslandsstofu en minnst þrír af sjö í henni tengjast Sjálfstæðisflokknum með beinum hætti. „Gæti eins verið framkvæmdaráð flokksins,“ skrifar Árni. Myndina má sjá hér fyrir ofan.