Tómas Guðbjartsson læknir er í viðtali í helgarblaði DV. Þar er hann spurður hvort einhver eftirmál hafi orðið vegna þess að hann steig fram síðastliðið haust og gagnrýndi slæman aðbúnað á Landspítalanum. „Það má segja að ég hafi fengið tiltal og verið tekinn á teppið, sem ég átti svo sem alveg eins von á,“ segir Tómas. „Deildarstjórum á deild þar sem sjúklingar voru á göngunum fannst ekki gott að láta þetta ástandið á þeirra deildum spyrjast út, sem er skiljanlegt. Ég fékk ábendingar um að umræðan væri spítalanum ekki til framdráttar og var beðinn um að hugsa mig aðeins um. Mér var bent á að þessar myndbirtingar mínar væru kannski ekki aðferðarfræði sem væri vænlegust til árangurs, en ég er ekki endilega sammála því. Í sjálfu sér sögðu menn þetta ekki í illu og ég tók þetta til greina. Það er hins vegar vandamál í sjálfu sér hvað við sem vinnum á Landspítalanum erum meðvirk með slæmu ástandi og höfum verið lengi.“