Þrátt fyrir að Jónas Kristjánsson, fyrrverandi ritstjóri DV, hafi látist í fyrra þá lifa orð hans. Á samfélagsmiðlum deila nú margir pistli hans frá árinu 2012 sem fjallaði um Samherja. Einn þeirra er til að mynda Mikael Torfason, sem var náinn samstarfsmaður Jónasar.

Ljóst er að fólki finnst orð Jónasar eiga við jafnvel í dag og þá. „Þorsteinn Már Baldvinsson lætur Samherja stunda stjórnlausa ofveiði við Vestur-Sahara í skjóli hernámsríkisins Marokkó. Siðblindur eigandi Moggans og Sjálfstæðisflokksins brýtur með þessu alþjóðalög og rænir matnum frá fátækum fiskimönnum í Vestur-Sahara. Þarna stundar Þorsteinn skefjalausa rányrkju í þriðja heiminum,“ skrifaði Jónas.

Jónas, sem var ekki þekktur fyrir að tala undir rós, heldur svo áfram: „Á sama tíma tekur hann áhafnir fiskiskipa og heilu plássin á Íslandi í gíslingu til að tefja þjóðareign íslenzkra auðlinda. Í alvöru þjóðfélagi sæti Þorsteinn á Litla-Hrauni. Í staðinn rífur hann stólpakjaft og gerir út Morgunblaðið og Sjálfstæðisflokkinn til að vernda hagsmuni sína.“