Haraldur Sigurjónsson er mikill aðdáandi sveitarinnar
Bandaríska jaðarrokksveitin Dinosaur jr. sækir nú Íslendinga heim, en hún mun halda tónleika í Silfurbergi í Hörpu á morgun, laugardaginn 22. júlí. Einn af þeim sem býður spenntur eftir tónleikunum er Haraldur Sigurjónsson, sem hefur verið aðdáandi sveitarinnar frá því seint á níunda áratugnum.
Dinosaur jr. var stofnuð árið 1984 af þeim J Mascis gítarleikara, Lou Barlow bassaleikara og Murph trommara og tóku þeir upp þrjár plötur áður en mannabreytingar urðu á síðustu öld. Árið 2005 komu upprunalegir meðlimir aftur saman og hafa þeir gefið út fjórar plötur eftir sameininguna. Alls hefur Dinosaur jr. gefið út ellefu plötur og kom sú nýjasta, Give a Glimpse of What Yer Not, út árið 2016. Platan innihélt talsvert af nýju efni og hlaut mikið lof gagnrýnenda og aðdáenda sveitarinnar.
Kvikmyndagerðarmaðurinn Haraldur Sigurjónsson er mikill aðdáandi Dinosaur jr. og hefur beðið spenntur eftir komu þeirra hingað til lands og ætlar að sjálfsögðu að mæta á tónleikanna, sem verða hans fyrstu með Dinosaur jr.
„Ég kynnist þeim í gegnum hjólabrettin seint á níunda áratugnum,“ segir Haraldur. „Ég var að vinna í hjólabrettabúðinni Hazar Bazar, sem var á Skólavörðustíg og í hjólabrettablöðunum voru alltaf auglýsingar frá hinum og þessum hljómsveitum. Þarna uppgötvaði ég sveitir eins og Red Hot Chili Peppers, Smashing Pumpkins og Dinosaur jr.“
„Maður heyrði líka lögin í hjólabrettamyndunum, ekki leiknum myndum, heldur klukkutímalöngum myndum frá helstu hjólabrettafyrirtækjum,“segir Haraldur. „Í þeim voru gæjar að skeita fyrir fyrirtækin og taka rosaleg trikk á brettin og spiluð rokk tónlist yfir. Á þessar myndir horfðu allir skeitarar dáleiddir til að læra ný trikk og að sjá uppáhaldsgæjann sinn skeita.“
Eftir að hafa kynnst Dinosaur jr. í gegnum hjólabrettin fór Haraldur að kaupa plötur með sveitinni og var Kiddi í Hljómalind (Kristinn Sæmundsson) duglegur að aðstoða hann. „Kiddi fylgdist vel með og benti manni á hitt og þetta, „heyrðu þú fílar svona, ég er með eina plötu fyrir þig“ átti hann til að segja þegar maður kom, segir Haraldur.
„Dinosaur jr. urðu mjög frægir í Englandi þegar þeir tóku lag Cure, Just Like Heaven, árið 1989. En tónlist þeirra er ekki fyrir alla. Þetta er hjólabretta pönk rokk, söngvarinn er með sérstakan söngstíl og þetta er hrátt rokk. Þeir gáfu út sína fyrstu plötu árið 1985, en sú sem seldist mest var sjötta plata þeirra árið 1994, þá voru allir mínir vinir í hljómsveitum og ég með kameru að taka upp.“
Reykvíska sveitin Oyama mun sjá um upphitun, en hún spilar jaðarrokk í anda tíunda áratugarins og sækir mikinn innblástur í Dinosaur Jr. Sveitin gaf plötuna Coolboy út árið 2014 við góðar undirtektir og Síðastliðið vor kom smáskífan Handsome Devil út. Oyama vinnur nú að efni fyrir næstu plötu.
