Á tólfta tímanum í gærkvöld var bensínsprengju kastað í kyrrstæðan mannlausan bíl í hverfi 104 í Reykjavík. Engan sakaði og voru gerendur horfnir af vettvangi er lögreglu bar að. Málið er til rannsóknar hjá lögreglu.

Þetta kemur fram í dagbók lögreglunnar á höfuðborgarsvæðinu og einnig þetta:

Á þriðja tímanum í nótt var tilkynnt um mann í annarlegu ástandi að öskra úti á götu í hverfi 104, skömmu síðar kemur önnur tilkynning um ónæði frá sama manni. Hann var vistaður í fangageymslu lögreglu uns vímuástandið rennur af honum.

Laust eftir klukkan eitt í nótt var tilkynnt um bílveltu í hverfi 111. Ökumaður var fastur í bílnum en komst út með aðstoð. Ekki liggja fyrir nánari upplýsingar.

Tilkynnt var um líkamsárás í sama hverfi um hálftíu í gærkvöld. Var gengið í skrokk á manni. Málið er í rannsókn.