Deborah Pilgrim hvarf nýlega þegar hún var í tjaldferðalagi í Ástralíu. Mikil leit var gerð að henni en eftir þriggja daga leit á landi og úr lofti hafði hún ekki fundist. Þá tók málið óvænta stefnu.

Pilgrim hafði farið í ferð í Sedan, sem er nærri Adelaid. Hún er 55 ára og var á ferð með vinum sínum þegar hún hvarf.

Eins og áður sagði skilaði leitin engum árangri. Á fréttamannafundi sagði talsmaður lögreglunnar að óttast væri um Pilgrim því stór og hættuleg skriðdýr væru á svæðinu og yrði hún bitin væri hún í lífshættu.

Skömmu síðar barst lögreglunni tilkynning frá manni sem á landskika utan alfaraleiða. Í eftirlitsmyndavélum sá hann að búið var að skrifa SOS í mölina í innkeyrsluna að landareigninni. Leitarmönnum var strax beint þangað og fundu þeir Pilgrim á næsta bæ en hún hafði komist inn í húsið þar og varð það henni líklega til lífs því þar hafði hún aðgang að vatni.

Hún var flutt á sjúkrahús í Angasto og var í ágætu ástandi að sögn lækna.