Það er ekki öllum gefið að endursegja vel þekktar sögur úr raunveruleikanum. Þessa list kann Vera Illugadóttir svo sannarlega. Ég var um það bil að slökkva á útvarpinu eitt helgarsíðdegi þegar ég heyrði rödd hennar. Hún var að láta hlustendur ímynda sér að Karl Bretaprins hefði myrt fjölskyldu sína. Ég gat ekki annað en lagt við hlustir. Vera vék síðan sögunni til Nepal þar sem voðaatburðir urðu í konungshöllinni árið 2001. Ég mundi þokkalega vel eftir þeirri frétt en frásögn Veru var svo lifandi og grípandi að ég settist niður og hlustaði til enda á harmræna sögu af prinsinum sem fékk ekki að ganga að eiga konuna sem hann elskaði og brást við á skelfilegan hátt.

Vera kann að segja sögu. Þarna lýsti hún öllum persónum þannig að þær urðu lifandi í huga manns og skapaði um leið andrúmsloft sem var þrungið spennu. Þegar kom svo að hinum örlagaríku atburðum varð maður hreinlega skelfdur, svo áhrifamiklar voru lýsingar Veru.

Þessi þáttur var endurfluttur, eins og ber að gera þegar efni eins og þetta á í hlut. Vera er frábær útvarpskona og efni hennar á að heyrast sem oftast. Hún kann að segja sögu þannig að maður leggur við hlustir.