Rithöfundurinn Hallgrímur Helgason hefur fengið gleðitíðindi frá nágrönnum okkar í Noregi, en þar er hann efstur á metsölulista Bokhandlerforeningen, sem eru samtök norskra bóksala.

Þetta er þriðja vika Hallgríms á listanum, en bók hans Sextíu kíló af sólskini var þar fyrst í þriðja sæti, svo öðru og nú í því fyrsta. Í öðru sæti þessa vikuna er glæpasagnadrottningin sænska, Camilla Lackberg, og í því þriðja má finna glæpasagnakónginn danska, Jens Henrik Jensen.

Hallgrímur deilir þessum stórtíðindum á Facebook: „Held þetta sé það óvæntasta á mínum ferli. Númer eitt í Noregi.“

Hann þakkar svo þeim fjölmörgu sem áttu þátt í að gera norsku þýðingu bókarinnar að veruleika svo hún fengi tækifærið til að verma efsta sæti metsölulistans.

Hamingjuóskunum rignir nú yfir Hallgrím frá vinum og kollegum.

Til dæmis skrifar rithöfundurinn Andri Snær Magnason : „Rosalegt!“ og fjölmiðlamaðurinn Egill Helgason lýsir því að bók Hallgríms hljóti að höfða til Norðmanna, enda hafi sögur af útgerðamönnum og veseni þeirra verið stór bókmenntagrein á árum áður þar í landi.

Bókin Sextíu kíló af sólskini fjallar um umbrotatíma í íslenskri sögu, þegar nútimin sigldi til hafnar á Norðurlandi og Norðmenn námu landið öðru sinni.