Mögnuð mynd sem sýnir hvernig bein konu hreyfast þegar hún fæðir barn hefur vakið mikla athygli á netinu. Yfir 50 þúsund manns hafa deilt myndinni á Facebook og hafa margir skrifað við myndina að þeir höfðu ekki hugmynd um að þetta væri hægt.

Fæðingarmiðstöðin Tangi Birth Services deildi myndinni á Facebook.

Myndin sýnir konu sem beygir sig yfir sjúkrarúm og sést mjög stór kúla hjá rófubeininu.

„Getur þú séð bunguna á neðra baki hennar? Þetta er „tígull Michaelis“ (e. rhombus of Michaelis),“ er skrifað með myndinni.

„Á öðru stigi fæðingar hreyfast nokkur bein, meðal annars spjaldbeinið, aftur á bak og með því að gera það þá eykur það þvermál mjaðmagrindarinnar.“

Það kemur fram að þetta er „alveg eðlilegt“ og þetta sé þekkt sem „opnun baksins“ (e. opening of the back).

„Þetta gefur barninu þínu eins mikið pláss og mögulegt er á meðan það finnur leið sína út í heiminn,“ stendur í færslunni.

„Til þess að „opna bakið“ þá skaltu notast við virkar fæðingarstöður þar sem þú stendur upprétt og beygir þig fram […] Líkami þinn er gerður fyrir þetta! Og líkaminn og barnið vinna saman! Fæðing er ekki eitthvað til að óttast, það er eitthvað til að skilja.“

Það hafa yfir 50 þúsund manns deilt myndinni og yfir 22 þúsund manns skrifað við myndina á Facebook.