Hljómsveitinni Hatara hefur verið stefnt fyrir samningsbrot og að sögn Wiktoriu Joanna Ginter verður málið tekið fyrir í Héraðsdómi Reykjavíkur á fimmtudaginn. Reyndar finnst málið ekki á máladagskrá Héraðsdóms fyrir fimmtudaginn í augnablikinu en hún verður væntanlega uppfærð.
Wiktoria er skipuleggjandi tónlistarhátíðarinnar Iceland to Poland. Wiktoria, sem hafði samband við DV vegna málsins, segir að samið hafi verið við Hatara í desember um að koma fram á hátíðinni. Nokkrum mánuðum seinna höfðu þeir öðlast heimsfrægð vegna þátttöku sinnar í Eurovision og þá segir hún að þeir hafi viljað fá meiri peninga fyrir að koma fram.
„Þeir eyðilögðu næstum hátíðina mína með græðgi sinni. Ég er með öll gögn hjá mér, samninginn og tölvupóstsamskipti,“ segir Wiktoria. Hún sagðist hins vegar ekki vilja senda DV þessi gögn, hún vildi frekar leggja þau fram í réttinum og blaðamenn gætu lagt mat á þau þar.
„Þegar ég sagði þeim að ég gæti ekki greitt þeim meiri peninga hættu þeir við og sökuðu mig um samningsbrot,“ segir Wiktoria.
Hátíðin fór fram dagana 20. – 24. ágúst og heppnaðist vel þrátt fyrir allt.
