Aðfaranótt sunnudags voru hjón nokkur á leið yfir Stórabeltisbrúnna á milli Sjálands og Fjóns í Danmörku. Maðurinn þurfti nauðsynlega að pissa og gat ekki haldið lengur í sér og stöðvaði konan aksturinn á miðri brúnni til að hann gæti pissað. Það er algjörlega bannað að stöðva á brúnni.

En eitthvað var samkomulag hjónanna slæmt því þegar maðurinn var farinn út til að pissa ók konan áfram og skildi hann eftir á miðri brúnni. Lögreglan á Sjálandi skýrði frá þessu á Twitter.

Góðhjartaður vegfarandi aumkaði sig yfir manninn og tók hann upp í og ók honum að gjaldhliðinu á brúnni. Þar hitti lögreglan á manninn og bætti enn á raunir hans með því að sekta hann fyrir að hafa gengið á brúnni.

Ekki er vitað hvernig manninum eða sambandi hjónanna reiddi af eftir þetta.