„Ef lögin heimiluðu mér að láta vana þig, þá myndi ég gera það.“ Þetta voru orð dómara í Oklahoma í Bandaríkjunum á miðvikudag áður en hann dæmdi hinn 39 ára gamla Ryan Alden í 150 ára fangelsi.
Ryan þessi var ákærður fyrir að brjóta með stórfelldum hætti gegn fjölmörgum einstaklingum. Hann var sakaður um að koma fyrir myndavélum á heimilum fólks. Kom hann vélunum fyrir í skápum, herbergjum og baðherbergjum. Þetta reyndist auðvelt fyrir Ryan sem starfaði fyrir fyrirtæki sem sér um að koma fyrir eftirlitsmyndavélum á heimilum fólks.
Ryan var einnig dæmdur fyrir að taka myndir undir pils kvenna, til dæmis í kirkjum og á veitingastöðum í Oklahoma. Fórnarlömb hans voru mörg undir lögaldri og því var hann einnig dæmdur fyrir framleiðslu á efni sem sýndi börn á kynferðislegan eða klámfenginn hátt.
Nokkur fórnarlambanna báru vitni í dómsal og lýstu afleiðingum brotanna. Saksóknarar töldu sannað að einhverjar myndanna hefðu farið í dreifingu á netinu. Um leið og það gerist reynist oftar en ekki ómögulegt að láta þær hverfa.
Verjandi Ryans fór fram á að hann yrði dæmdur í tíu ára fangelsi en dómari var á þeirri skoðun að það væri allt of vægur dómur. Var niðurstaðan því lífstíðarfangelsi.