Leikhópurinn Lotta flytur þessa dagana leikritið Litla Hafmeyjan. Leikritið er alla jafna sýnt í Elliðaárdalnum og hefur aðsóknin í sumar verið alveg frábær enda er búið að vera óvenju gott veður í sumar. Ekki eru þó allir sáttir en Björn Guðmundsson, faðir á fertugsaldri, fór með fimm ára dóttur sína á leikritið og gekk ekki þaðan með bros á vör.

Björn segir í samtali við DV að það sé samkynhneigður áróður í leikritinu.

„Prinsinn verður ástfanginn af strákahafmeyju og þeir fara að kyssast.“

Hann segir þetta vera áróður sem á alls ekki heima fyrir ung börn sem eru mörgum árum frá því að ná einhverjum kynþroska.

„Að þau skuli sýna þetta á sviði, ég horfði alveg yfir krakkahópinn og hvernig þau litu á foreldra sína, spurjandi hvað væri í gangi þegar strákarnir voru að kyssast.“

Aðspurður segir Björn þetta ekki vera eðlilegt og að þetta hefði verið allt öðruvísi ef þarna hefði verið um gagnkynhneigðan koss milli karls og konu. Hann segir að það hefði verið í lagi.

„Það er kannski allt annað þegar þau verða ástfangin, það er eðlilegt og náttúrulegt.“

Björn er ekki par sáttur með þetta og hefur ákveðið að ganga lengra.

„Ég er að kæra þetta mál. Þetta er bara óboðlegt fyrir þriggja til sex ára gömul börn, þetta er samkynhneigður áróður.“

Hann segir Leikhópinn Lottu vera að heilaþvo börnin til að halda að samkynhneigð sé eðlileg.

„Þetta er náttúrulega bara heilaþvottur, það er verið að heilaþvo ung börn að það sé eðlilegt að fólk af sama kyni…að það skiptir ekki máli af hvaða kyni þau séu til að vera saman.“

Anna Bergljót, framkvæmdastjóri Leikhópsins Lottu, talaði við DV um málið.

Hún segir Björn hafa verið í sambandi við þau varðandi málið og að hann hafi látið þau vita af fyrirhuguðum áætlunum sínum um að kæra málið.

Anna segir samkynhneigð ekki vera boðskap í leikritinu en frekar sé bara verið að gera tilraun til þess að normalísera hana. Boðskapurinn í leikritinu er frekar sá að henda ekki rusli í sjóinn en hafmeyjurnar þurfa að kljást við alls kyns vandamál sem fylgja því.

Björn var ekki sáttur yfir þeim boðskap heldur en hann sagði við Önnu að þau væru að láta lítil börn fá samviskubit fyrir að henda rusli í sjóinn.

Anna segir síðan í samtali sínu við DV að það sé ekkert að því að börn fái samviskubit fyrir að henda rusli í sjóinn, það hvetur þau þá frekar í að henda ruslinu í ruslatunnur.

„Ég einfaldlega dauðvorkenni þessum manni“