Ingileif Friðriksdóttir dagskrágerðarkona hefur um langa hríð verið ötul baráttukona um málefni samkynhneigðra og hún birti nýverið færslu þar sem hún greinir frá nýjasta verkefni sínu.

„Ég er stolt af ýmsu sem ég hef gert í gegnum tíðina, en Hinseginleikinn er það verkefni sem ég er allra stoltust af. Það sem hófst sem lítil hugmynd í prófatíð í háskólanum vorið 2016 en hefur síðan þá þróast út í svo kraftmikinn fræðsluvettvang og raunar samfélag sem ég gæti ekki verið þakklátari fyrir að vera hluti af. Hinseginleikinn hefur tekið á sig ýmsar myndir, verið á samfélagsmiðlum, orðið að sjónvarpsþætti og fyrirlestrastöð – en nú er Hinseginleikinn orðinn að podcast-seríu sem ég er svo spennt að deila með ykkur.

Fyrsti þátturinn er kominn á Spotify og væntanlegur á aðrar steymisveitur – en þar fer ég yfir söguna sem ekki má gleymast og á magnað spjall við hinn eina sanna Pál Óskar. Þættirnir eru gefnir út ásamt @rúvnúll í tilefni 50 ára afmælis Stonewall-uppþotanna í New York og 20 ára afmælis Hinsegin daga hér á landi og munu koma inn vikulega á þriðjudögum næstu sex vikurnar. Ég er ótrúlega stolt af útkomunni og hvet ykkur til að hlusta.“ Með færslunni fylgdi falleg mynd af Ingileif sem væntir frumburðar síns síðar í mánuðinum. Ingileif er gift Maríu Rut Kristinsdóttur en hún á son úr fyrra sambandi. Hjónin giftu sig síðastliðið sumar á Flateyri en Ingileif starfar sem blaðamaður og söngkona en hefur jafnframt starfað við dagskrárgerð í sjónvarpi og er meðal spurningahöfunda og dómara Gettu betur.