Á næstu árum á að fjölga gistirýmum á öryggissvæðinu á Keflavíkurflugvelli um allt að 300. Samkvæmt tillögu að deiliskipulagi á að koma upp gistiaðstöðu fyrir allt að 1.000 manns á vestursvæðinu en þar verður um skammtímagistingu að ræða í gámarými. Á austursvæðinu er nú gistiaðstaða fyrir 200 manns í átta gistihúsum sem eru ætluð fyrir tímabundna dvöl. Þar er gert ráð fyrir að bæta megi fjórum húsum við og verði hvert þeirra með gistiaðstöðu fyrir um 70 manns. Sterkur orðrómur hefur verið á kreiki um að Bandaríkjamenn hyggist snúa aftur til Keflavíkur og endurvekja herstöð sína vegna stöðunnar í alþjóðamálum.

Fréttablaðið skýrir frá þessu í dag. Blaðið hefur eftir Sveini Guðmarssyni, upplýsingafulltrúa utanríkisráðuneytisins, að þessar framkvæmdir þýði ekki að hér muni herafli verða varanlega.

„Þær framkvæmdir sem eru fram undan á vegum Bandaríkjahers eru ekki til marks um að varanleg viðvera hans hérlendis standi til. Liðsafli á vegum Bandaríkjahers hefur verið hér á landi af og til frá árinu 2008 við loftrýmisgæslu og önnur varnartengd störf.“

Er haft eftir Sveini sem sagði einnig að stundum séu rúmlega 400 erlendir hermenn hér að störfum en oft séu þeir færri. Sumir komi með stuttum fyrirvara en viðveran hafi aukist á undanförnum árum vegna aukinna umsvifa, til dæmis í tengslum við kafbátaeftirlit. Hann sagði æskilegt að hermennirnir dvelji á öryggissvæðinu þegar þeir eru hér við loftrýmisgæslu og æfingar. Þegar ekki hefur verið nægilegt pláss hafa hermenn þurft að gista á hótelum.

Fram hefur komið í fréttum að Bandaríkjaher hafi greitt rúmlega 14 milljónir dollara í innviðauppbyggingu á Keflavíkurflugvelli á síðasta ári og áætlað er að upphæðin verði 57 milljónir dollara á næsta ári.