Um klukkan 20 í gærkvöldi var tilkynnt um líkamsárás við Njálsgötu. Þar höfðu þrír menn veitt þeim fjórða áverka og stolið síma hans. Áverkarnir voru minniháttar og gerendurnir voru farnir af vettvangi þegar lögreglan kom. En þeir áttu eftir að koma meira við sögu lögreglunnar á næstu klukkustund.

Rétt fyrir klukkan 21 var tilkynnt um líkamsárás við Vitatorg en þar voru tveir menn sagðir vera að ganga í skrokk á liggjandi manni og sparka í höfuð hans. Þarna reyndust vera komnir tveir þeirra sem höfðu veitt manni áverka við Njálsgötu klukkustund áður. Þeir voru handteknir. Árásarmennirnir höfðu viljað selja þolandanum síma en hann vildi ekki kaup. Hann vildi ekki gera neitt frekar í málinu en hann slapp með minniháttar áverka.

Á fimmta tímanum í nótt voru tveir menn handteknir við Gnoðarvog en þar voru þeir á stolinni bifreið. Þeir eru um tvítugt. Með þeim í bifreiðinni var 13 ára stúlka. Henni var komið til foreldra sinna og tilkynning send til barnaverndaryfirvalda.

Síðdegis í gær höfðu lögreglumenn afskipti af tveimur ungum konum í verslun í Smáralind en þær voru sagðar hafa neytt fíkniefna í mátunarklefa. Þær voru kærðar fyrir vörslu fíkniefna, eignaspjöll og þjófnað.

Einn ökumaður var handtekinn í Hafnarfirði í gærkvöldi en hann er grunaður um akstur undir áhrifum fíkniefna og að hafa verið með fíkniefni í fórum sínum.

Á tíunda tímanum í gærkvöldi var bifreið ekið á rafmagnskassa í Garðabæ. Engin slys urðu á fólki. Orkuveitunni var tilkynnt um óhappið.