Hópur sýrlenskra flótta barna kom færandi hendi í Þjóðleikhúsið í dag. Færðu þau leikhúsinu leikföng sem koma til með að vera hluti af sýningunni Álfahöllin. Stefnt er að frumsýningu næsta laugardag.

Þjóðleikhúsið hefur undanfarna daga safnað 6107 leikfangafígúrum fyrir umrædda leiksýningu í leikstjórn Þorleifs Arnar Arnarssonar. Líkt og fram kemur í tilkynningu verða leikfangafígúrurnar hluti af heimi verksins og eru táknrænar fyrir þau 6.107 börn sem líða skort á Íslandi um þessar mundir.

„Þessar yndislegu mannverur eru nýfluttar til Íslands frá Sýrlandi. Eitt af þeirra fyrstu verkum var að gefa leikföngin sín í söfnun Þjóðleikhússins. Við ættum að taka þau okkur til fyrirmyndar. Það þarf ekki ríkidæmi til að gefa,“ ritar Halla R.H. Kristínarrdóttir starfsmaður miðasölu Þjóðleikhússins á facebooksíðu sína og birtir þar meðfylgandi mynd af hinum föngulega barnahóp.

Á facebooksíðu Þjóðleikhússins kemur fram að leikhúsinu hafi þótt sérstaklega vænt um þessa heimsókn. Þá kemur einnig fram að ennþá er möguleiki á að gefa leikföng í söfnunina. Ýmsar tegundir af leikföngum koma til greina, svo sem bangsar, brúður, playmokallar og þess háttar fígúrur. Að sýningum loknum munu leikföngin svo fá heimili þar sem þeirra er þörf.