Í svari mannauðsdeildar Reykjavíkurborgar við fyrirspurn Vigdísar Hauksdóttur, borgarfulltrúa Miðflokksins, um starfslokasamninga borgarinnar frá 2011-2018, kemur í ljós að samtals voru gerðir 23 starfslokasamningar, og námu viðbótargreiðslur vegna þeirra rúmum 100 milljónum á tímabilinu. RÚV greinir frá.
Í fyrra voru gerðir starfslokasamningar við fimm manns og er samanlögð upphæð samninganna 38 milljónir, eða 7.6 milljónir á hvern starfsmann að meðaltali.
Árið á undan, 2017, gerði Reykjavíkurborg starfslokasamninga við tvo starfsmenn, hvers heildarkostnaður nam rúmlega einni milljón króna.
Árið 2016 kostaði hinsvegar uppgjör við jafnmarga starfsmenn hinsvegar 12.5 milljónir.
Í svarinu kemur fram að í flestum starfslokasamningum hafi verið samið um sérstakt vinnuframlag/ráðgjöf eftir að störfum starfsmanns lauk.
Meirihlutinn í borgarstjórn lét bóka á borgarráðsfundi í gær, að samkomulag um starfslok væri undantekning, sem í flestum tilfellum væri aðeins gert þegar um viðkvæm starfsmannamál væri að ræða, eða þegar viðkomandi væri beðinn um að klára eða fylgja eftir sérstökum verklokum eftir starfslok sín.
Vigdís Hauksdóttir gagnrýndi þetta fyrirkomulag í bókun sinni:
„Fyrir 10 mánuðum lagði ég fram fyrirspurn í borgarráði um starfslokasamninga sem borgin hefur gert við starfsmenn. Það er með ólíkindum hvað svarið berst seint þrátt fyrir miklar eftirspurnir eftir svari við fyrirspurninni. Alls hafa verið gerðir 23 starfslokasamningar á árunum 2011-2018 og kostnaðurinn við þá eru rúmar 100 milljónir. Þetta er mikil sóun á almannafé og algjörlega óásættanlegt.“
Í svarinu kemur fram að tafirnar séu vegna þess að skipt hafi verið um mannauðs- og launakerfi árið 2016 og erfitt hafi reynst að nálgast upplýsingar úr eldra kerfinu.
