Nú er svo komið að of mikið af skemmtiferðaskipum koma til Noregs. Komur þeirra skemma lífsgæði heimamanna og skaða orðspor landsins. Svona hljóða skilaboðin frá NHO Reiseliv sem eru hagsmunasamtök fyrirtækja í ferðamanna- og afþreyingaiðnaðinum.

Kristin Krohn Devold, forstjóri NHO, sagði á TV2 á sunnudaginn að Norðmenn glími við vanda vegna mikils ferðamannastraums á suma staði í landinu á ákveðnum árstímum og þessi vandi tengist að mestu skemmtiferðaskipum. Hún telur að þessi mikli fjöldi ferðamanna skaði orðspor norskra bæja og annarra viðkomustaða ferðamanna og óttast að ástandið verði eins og í Feneyjum og í Barcelona. Þar eru heimamenn orðnir langþreyttir á miklum fjölda ferðamanna sem hafa mikil áhrif á innviði og samfélagið í heild.

Þess utan sagði Devold að farþegar skemmtiferðaskipa skilji ekki næga peninga eftir í Noregi. Þeir sem koma akandi langar leiðir til að búa í viku á hóteli eyði miklum peningum en eigi orðið erfitt með að komast leiðar sinnar vegna farþega skemmtiferðaskipa.

Á undanförnum sjö árum hefur farþegum skemmtiferðaskipa, sem fara í land í Noregi, fjölgað um tæplega 1,5 milljónir eða rúmlega 56 prósent. Reiknað er með að fjórar milljónir farþega skemmtiferðaskipa heimsæki Noreg á þessu ári.