Bandaríska leikkonan Jennifer Aniston er í frábæru formi og er það ekki síst að þakka réttu mataræði og reglubundinni hreyfingu.
Aniston, sem varð fimmtug í febrúar síðastliðnum, er með mörg járn í eldinum en á næstu dögum verður frumsýnd myndin Murder Mystery þar sem hún fer með aðalhlutverk ásamt Adam Sandler.
Einkaþjálfari Jennifer Aniston heitir Leyon Azobuike og nýtur hann talsverðrar virðingar í faginu.
Leyon fær margar margar fyrirspurnir á Instagram frá fylgjendum sínum, sem vilja gjarnan fá upplýsingar um hvernig þeir geta litið út eins og átrúnaðargoðin, Jennifer Aniston sem dæmi. Nýlega fékk hann spurningu þar sem hann var beðinn um að mæla með hvað best væri að gera fyrir æfingu, meðal annars með tilliti til næringar.
Leyon segir að huga þurfi að ýmsum þáttum þegar fólk vill koma sér í form eða halda sér í formi. Mikilvægt sé að huga að heilsunni allan sólarhringinn, ekki bara rétt fyrir æfingar eða rétt eftir æfingar.
Leyon segir að fólk þurfi að gæta þess að fá nægan nætursvefn, sex tíma að lágmarki, og þá þurfi að gæta þess að borða næringarríka og fjölbreytta fæðu; blöndu af flóknum kolvetnum, prótínum og grænmeti. Þá segir hann að fólk verði að passa upp á að drekka nóg af vatni.
„Það er algengur misskilningur að þú eigir að bíða eftir því að verða þyrst eða þyrstur. Ef þú drekkur mikið fyrir æfingu er hætta á að maður verði of þungur á sér. Það þarf að hugsa dæmið lengra og í raun og veru ættirðu að vökva líkamann mjög reglulega yfir daginn.“
Leyon nefndi hér að framan flókin kolvetni og prótín en hann mælir einnig með því að fólk borði nóg af góðri fitu. „Ég elska avókadó, kókosolíu, lax, fiskiolíu – allt sem inniheldur góða og holla fitu.“
Sjálfur kveðst hann takmarka neyslu á kolvetnum og prótínum og miða hana við líkamsþyngd sína; 1,7 grömm af kolvetnum á dag fyrir hvert kíló líkamsþyngdar og 2 grömm af prótínum. Einstaklingur sem er 60 kíló ætti þá, samkvæmt þessu að borða 102 grömm af kolvetnum og 120 grömm af prótínum á dag. Ofan á þetta fái hann hitaeiningar úr neyslu á fitu.
En hvað mælir hann með að gera fyrir æfingu?
„Um klukkutíma fyrir æfingu, hlaupaæfingu til dæmis, þá fæ ég mér eina skeið af hnetusmjöri, banana og smá brauð. Ég veit að þessi blanda mun gefa mér nóg til að komast í gegnum æfinguna.“
Leyon bendir þó á að það sem virkar fyrir einn þarf ekki endilega að virka fyrir alla. „Maður þarf að prófa sig áfram og ef til vill gera mistök,“ segir hann og bætir að lokum við að sniðugt geti verið að skrifa niður hvað maður borðar fyrir æfingu. Það sé gott að halda sig við það sem lætur manni líða vel meðan á æfingu stendur.
