Samkvæmt frumniðurstöðum gagnaöflunar meðal hjúkrunarfræðinema, sem útskrifuðust úr HÍ og HA á síðasta ári, fundu 31% þeirra fyrir mikilli streitu í námi og 62% fyrir miðlungsmikilli streitu. 38% töldu sig vera að miklu eða mjög miklu leyti útbrunnin vegna námsins.

Morgunblaðið skýrir frá þessu í dag. Fram kemur að gagnaöflunin hafi verið fyrsti hluti rannsóknar sem er ætlað að skanna almenna streitu meðal hjúkrunarfræðinema, streitu tengda námi, kulnun, bjargráðum við streitu, framtíðaráformum í hjúkrun og bakgrunnsbreytur meðal hjúkrunarfræðinema.

Niðurstöður erlendra rannsókna sýna að kulnun í námi hefur áhrif eftir útskrift. Kulnun hefur einnig verið tengd við lakari faglega færni í starfi að námi loknu og ákvörðun fólks um að hætta að starfa við hjúkrun.