Stjórnvöld Norður-Kóreu skutu upp eldflaug í gærkvöldi sem sprakk skömmu eftir að hún tókst á loft. Bandaríkjaforseti lýsir yfir óánægju sinni á ítrekuðum eldflaugatilraunum. BBC greinir frá þessu á vef sínum.

Eldflauginni var skotið upp á tilraunasvæði í sunnanverðri Pyeongan-sýslu skammt frá höfuðborginni Pyongyang, að því er heimildir frá Suður-Kóreu herma. Eldflaugin sprakk skömmu eftir flugtak og dreif ekki út yfir landamæri Norður-Kóreu.

Donald Trump er uggandi yfir stöðu mála og segir tilraunina stangast algerlega á við beiðni kínverskra stjórnvalda. Hann skrifaði í Twitter-færslu í gær að „Norður-Kórea hefði vanvirt óskir Kínverja og hins virta forseta þeirra með eldflaugaskotinu.“

Trump fundaði nýverið með forseta Kína, Xi Jinping. Hann hrósaði honum fyrir að leggja hart að sér við að reyna að halda aftur að eldflauga- og kjarnorkutilraunum Norður-Kóreu.

Tilraunin í gærkvöldi var framkvæmd fáeinum klukkustundum eftir að öryggisráð Sameinuðu Þjóðanna ræddi um eldflaugaáætlun Norður-Kóreu og ógn hennar við alþjóðasamfélgið.

Togstreitan á Kóreuskaga hefur aukist upp á síðkastið, en bæði Norður- og Suður-Kórea standa í heræfingum.

Samkvæmt frétt BBC er talið að Norðu-Kóreumenna séu að kappkosta að þróa fyrirferðarminni kjarnorkusprengjur, sem hægt sé að koma fyrir á langdrægum eldflaugum. Þeim sé síðan ætlað að geta drifið til Bandaríkjanna.