Mayeth Gudmundsson, frá Filippseyjum, hefur fengið bréf frá Útlendingastofnun þar sem henni er tjáð að ákvörðun um synjun dvalarleyfis hafi verið afturkölluð. Blaðamaður DV ræddi við eiginmann hennar Pjetur í dag og var hann ánægður með þessar nýjustu vendingar en segir þó að málið sé enn þá í skoðun hjá stofnuninni og þetta því aðeins áfangasigur.
DV hefur greint ítarlega frá málinu undanfarna daga og það ratað inn umræður á Alþingi en þar vakti Inga Sæland, formaður Flokks fólksins athygli á málinu.
Fjölskyldan hefur lifað í mikilli óvissu síðan Mayeth fékk bréf um að dvalarleyfisumsókn hennar væri synjað. Pjetur og Mayeth hafa verið gift í tæp 11 ár og eiga saman 10 ára gamla dóttur, Aimee Áslaugu. Vegna örorku Pjeturs gátu hjónin ekki sýnt fram á nægar tekjur. Átti því Mayeth að vera komin úr landi í dag, föstudaginn 24. maí.
Í bréfi Útlendingastofnunar segir:
„Með vísan til 1. tl. 1. mgr. 25. gr. stjórnsýslulaga nr. 37/1993 er ákvörðun Útlendingastofnunar dags 6. maí 2019 um synjun umsóknar Mayeth Gudmundsson, ríkisborgara Filippseyja um dvalarleyfi á Íslandi sem maki Íslendings hér með afturkölluð og verður umsóknin tekin aftur til meðferðar hjá stofnuninni.“
Tengdar fréttir:
Mayeth og Pjetur bíða í óvissunni
Útlendingastofnun sundrar fjölskyldu – Sendir eiginkonu Pjeturs úr landi eftir tíu ára hjónaband
