Lof vikunnar fá þingforsetar Alþingis, Steingrímur J. Sigfússon, Brynjar Níelsson og Guðjón S. Brjánsson, sem setið hafa fram á rauðanætur yfir málþófi Miðflokksmanna varðandi þriðja orkupakkann. Þjáningar þeirra eru áþreifanlegar og þrautseigjan aðdáunarverð. Þeir eru líkt og vitaverðir áður fyrr, á afskekktum skerjum, sem afsöluðu sér öllum lífsgæðum og skemmtunum til þess að sinna almannaheill. Leiðindin voru þó sennilega minni í einverunni.
Ekki eru nema tveir mánuðir síðan kjarasamningar aðila vinnumarkaðarins voru undirritaðir. Engu að síður hafa sumir mundað skóflurnar til að grafa undan þeim. Verðhækkanir Íslensk ameríska eru vel þekktar og ósvífnar. Þá hefur Árni Valur Sólonsson, hótelstjóri hjá CityPark, CityCenter og CapitalInn, strax tekið ákvörðun um að lækka launakostnað hjá sér. Setur þetta kjarasamningana og stöðugleikann í bráða hættu.
