Í dag verður áfram unnið við að fræsa og malbika í borginni og viðbúið að því fylgi einhver óþægindi fyrir vegfarendur. Lögregla hvetur fólk til að sýna þolinmæði og tillitssemi því vinnuflokkar verða víða að störfum í dag.

Vinnuflokkar verða að störfum meðal annars á Hallsvegi í Grafarvogi, á milli Langarima og Gullinbrúar/Strandvegar, í Vatnagörðum, á milli Sundagarða og Sægarða og í Mjölnisholti og á Lindargötu.

„Vegfarendur eru áfram beðnir um að virða merkingar og hraðatakmarkanir og sýna aðgát við vinnusvæðin, sem eru þröng og menn og tæki eru við vinnu mjög nálægt akstursbrautum.“

Þá segir lögregla í tilkynningu að vegna framkvæmda eins og þessara berist gjarnan kvartanir, en í gær höfðu margir samband við embættið og lýstu yfir ónægju sinni með framkvæmdir á Kleppsmýrarvegi og töfum á umferð sem því fylgdi. „Úr varð að lögreglan fór á vettvang og var þar við umferðarstjórn í nokkra klukkutíma, en vonandi verður ástandið betra á og við þær götur þar sem framkvæmdir eru fyrirhugaðar í dag.“

DV ræddi við nokkra ökumenn sem voru fastir í umferðarteppum víðsvegar á höfuðborgarsvæðinu síðdegis í gær. „Ég er búin að vera föst í klukkutíma á Suðurlandsbrautinni,“ sagði kona sem hafði samband við DV.