Guðmundur Andri Thorsson, þingmaður Samfylkingarinnar, vandar Miðflokknum ekki kveðjurnar vegna málþófsins á Alþingi. Þingfundur hófst upp úr hádegi í gær og kláraðist hann ekki fyrr en nú á níunda tímanum í morgun. Þingmenn Miðflokksins hafa rætt málefni þriðja orkupakkans sín á milli.

Sjá einnig: Maraþonmálþóf Miðflokksins stóð til 8.40 – Dagskrá þingsins riðlast

„Málþóf er fjandsamleg yfirtaka á Alþingi, framkvæmd með því að toga og teygja venjur og reglur. Það er leið til þess að láta þingræðið ekki hafa sinn gang. Menn koma upp í ræðustól og tala en ofmælt er að kalla það ræður sem þar er flutt – miklu frekar nokkurs konar óræður. Óræða eftir óræða dynur á okkur og andsvörum er breytt í meðsvör blygðunarlaust,“ segir Guðmundur Andri.

Guðmundur segir að málþóf geti nýst við ákveðnar aðstæður en svo virðist sem þingmenn Miðflokksins líti á það sem einhverskonar kappleik.

„Þetta sýnir mikið virðingarleysi fyrir ræðustólnum og stofnuninni. Málþóf getur verið neyðarréttur minnihluta þegar meirihluti keyrir í gegn ólög en Miðflokkurinn lítur á það sem íþróttakeppni, leið til að sýna styrk og getu til að beita ofríki.“