Fjöldi þjóðþekktra Íslendinga fordæmdir á Twitter nafnalausan pistil sem birtist í Viðskiptablaðinu á dögunum. Í pistlinum er Greta Thunberg, 16 ára sænsk stúlka sem hefur vakið mikla athygli á undanförnum mánuðum fyrir baráttu í loftslagsmálum, gagnrýnd og að hún sé einhverf gert að umtalsefni.

Meðal þeirra sem gagnrýna þetta er María Rut Kristinsdóttir, aðstoðarmaður formanns Viðreisnar, Þorgerðar Katrínar Gunnarsdóttur. Hún segir pistil Viðskiptablaðsins mjög ósmekklegan. „Ósmekklegt. Og að blanda einhverfu í þetta er út í hött. Ég á einn slíkan og ég sver það að ef að allir væru eins og hann og Greta – væri heimurinn betri staður. Og já umhverfismál snúast ekki um vinstri-hægri pólitík. Heldur eitthvað sem við öll eigum að láta okkur varða,“ segir María Rut.

Andri Snær Magnason, rithöfundur og fyrrverandi forsetaframbjóðandi, merkir sérstaklega Viðskiptablaðið og spyr hvort blaðið sé að grínast. Tónlistar- og sjónvarpsmaðurinn Unnsteinn Manuel Stefánsson gagnrýnir þessi skrif enn fremur og segir þau hallærisleg. „Jesús hvað Viðskiptablaðið er hallærislegt. Ríkjandi hópur í samfélaginu, sem lætur eins og það sé pláss fyrir vinstri-hægri gjá í loftslagsmálum. En þó þessi hópur sé valdamikill, þá er hann líka lítill og einsleitur, sem verður honum að falli,“ segir Unnsteinn.

Ýmsir taka undir með Unnsteini í athugasemdum og þar meðal er Helgi Seljan Jóhannsson fjölmiðlamaður. „Myndatextinn: „GT er stúlka frá Svíþjóð“. Þetta er svo yfirmáta plebbalegt að nefna ætti smáborgarana á Hamborgarafabrikkunni í höfuðið á höfundinum,“ skrifar Helgi.