Á laugardaginn voru farþegar komnir að brottfararhliði einu á Louisville alþjóðaflugvellinum í Kentucky í Bandaríkjunum og biðu þess að ganga um borð. En nokkrum mínútum áður en hleypa átti farþegunum um borð birtust lögreglumenn við brottfararhliðið og fóru um borð í flugvélina og handtóku flugmann hennar, hinn 51 árs Christian Richard Martin. Hann er grunaður um þrjú morð.

„Þetta var eins og atriði í kvikmynd.“

Sagði Ashely Martin, einn farþeganna, í samtali við WDRB sjónvarpsstöðina.

Flugmaðurinn er grunaður um að hafa myrt hjón og nágranna þeirra í Kentucky í nóvember 2015. Þann 18. nóvember fannst Calvin Phillips skotinn til bana á heimili sínu í Pembroke. Lík eiginkonu hans, Pamela, og nágranna þeirra, Edward Dansereau, fundust í bíl í nokkurra kílómetra fjarlægð frá heimili hjónanna.

Christian Richard Martin flutti til Norður-Karólínu fljótlega eftir morðin og gekk laus þar til á laugardaginn. Hann var úrskurðaður í gæsluvarðhald og getur ekki fengið lausn gegn greiðslu tryggingar og mun því sitja í varðhaldi þar til réttarhöld í málinu hefjast.